May-Len Skilbrei er no tilsett i ei 10-prosent stilling på Voldsprogrammet ved NOVA, OsloMet.
Skilbrei er sosiolog og har sidan midten av 1990-tallet forska på spørsmål om forholdet mellom kjønn, seksualitet og makt.
Dei siste åra har ho vore spesielt oppteken av kjønn og sårbarheit i migrasjonsprosessen og av rettsleg og velferdspolitisk handtering av prostitusjon, menneskehandel og valdtekt.
Skilbrei vil framover jobbe på Voldsprogrammet på NOVA ved sidan av si stilling som professor i kriminologi ved Universitetet i Oslo.
Ho er allereie involvert i samarbeid med NOVAs forskarar på Voldprogrammet, men vil no bli endå meir integrert i arbeidet med å vidareutvikle programmet og å styrke den vitskaplege formidlinga frå satsinga.